حاتجن ياريت ياخوانا
مارحتش لندن ولا باريز
دى بلاد تمدين
ونضافه وزوق ولطافه
وحاجه تغيظ
مالاقيتش جدع متعافى
وحافى
وماشى يقشر خص
ولا شحط مشمرخ افندى
معاه عود خلفه
ونازل مص
ولا لب اسمر
وسودانى وحمص
وانزل ياتقزقيز
حاتجن ياريت يا اخوانا
مارحتش لندن ولا باريز
ولا عركه فى نص الليل
دايره بالحيل
وساحبها بوليس
قدامها جدع متجرجر
وشه معور
قال ايه دا عريس
والخلق ماهى بتتجوز
واشمعنى احنا مفيش تمييز
حاتجن ياريت يا خوانا
مارحتش لندن ولا باريز
ولا واحده فى وش الفجر
تبرطع ماليه الدنيا صوات
قال ايه
جوز خالتى ام احمد
سلفة اخوها السيد مات
سبحانك مااعظم شأنك
والله الموت
دا مفيد ولذيذ
حاتجن ياريت يا اخوانا
مارحتش لندن ولا باريز
ولا واحد طالع يجرى
وواحد تانى بيجرى وراه
ويقول هاهع حصلتك
يابن اللى ابصر ايه عاملاه
لا الشارع غيط يا جماعه
ولا احنا بداره
ولا احنا معيز
حاتجن ياريت يا اخوانا
مارحتش لندن ولا باريز
ولا واحد بيبيع حاجه
يقول بريال وتاخدها بصاغ
يااخوانا دى لحد الابره
تاخدها بدوشه وقلب دماغ
والداهيه ان احنا قلاشوه
ونكته
وفالحين فى التأووويز
حلفان وعراك ومناهده
ويمكن ضرب كفوف
ياحفيظ
حاتجن ياريت يا اخوانا
مارحتش لندن ولا باريز
دى بلاد تمدين
ونضافه وزوق ولطافه وحاجه تغيظ